Tommarar.com

Kalli Tomm var einstakur hirðumaður; það var sama hvort það var húsið hans, bílinn eða annað sem að hans úthaldi laut, allt varð að vera í toppstandi og snyrtilegt. Það sama átti við um bræður hans, en enginn þeirra komst með tærnar þar sem Kalli hafði hælana í þessum efnum.

Kalli með bílinn sinn og dætur fyrir framan Hafnarstræti 15

Á einni myndinni sem fylgir þessari grein er hann með einn fyrsta bílinn sinn, sem var A 28. Seinna fékk hann númerið A 828, sem var til dæmis á “pissubílnum”, sem Kalli keyrði um götur bæjarins áður fyrr, til að rykbinda þær. Það var áður en malbikið kom. Það var mikið sport hjá ungviði bæjarins, að hlaupa á eftir “pissubílnum” með það markmið, að komast í bununa.

Hér er gamli A 1828 á leið í sveitina. Hann er fullkomlega gangfær, en ekki á númerum, þannig að hann fékk far á vagni

Það mun hafa verið árið 1962, sem kalli kaupir sér Benz fólksbíl í félagi við Jón Emil son sinn. Seljandinn var Snorri Ólafsson, læknir í Kristnesi, sem hafði átt bílinn frá því hann var fluttur til landsins. Þeir feðgar byrjuðu á því að ryðverja bílinn og það var nú ekki kastað höndunum til þess verks. Þeir fengu inni hjá “Geira bróður” á Bifröst og nostruðu við hvern krók og kima í undirvagninum. Kalli setti númerið A 1828 á bílinn. Hann er módel 1955.

Þegar Jón Emil fór að læra flugvirkjun í Bandaríkjunum keypti Kalli hans hlut í Benzanum og átti hann einn eftir það. Bílinn var alltaf gljáfægður hjá Kalla og frá því hann lést hefur Benzinn staðið inni í bílskúr við Hafnarstræti 15. En nú hefur húsið verið selt úr fjölskyldunni, þannig að það þurfti að fjarlægja bílinn. Það var gert um síðustu helgi og nú er Benzinn kominn til Sverris Ingólfssonar á Ystafelli. Þar verður hann staðarprýði, því bílinn ber eiganda sínum gott vitni. Hann er keyrður 176 þúsund kílómetra.

Tomi Tomm keyrði vörubíl frá Bifröst, eins og bræður hans margir, en Geiri var þar lengst og síðustu árin stðvarstjóri.

Bifröst var félag í eigu Helga Tryggvasonar og fleiri manna, sem voru handgengnir KEA. Þeir stofnuðu Bifröst sem hlutafélag, upphaflega til að aka  úr og í grunn KEA byggingarinnar. Þar byrjaði Geiri 1930, nýbúinn að fá bílpróf og vann þar alla sína tíð. Tommi var þarna líka nokkur ár, áður en hann fór í Slökkvilið Akureyrar. KEA yfirtók síðar rekstur Bifrastar og bílastöðin varð deild í KEA. Um Bifröst orti Krisjtán frá Djúpalæk:

Bifröst var lengi til húsa í Skipagötu 18, þar sem blómabúðin er nú.

Nafnið Bifröst valið var,

vígi svindlaranna.

Stýrir heimskur Helgi þar

hópi glæpamanna,

Kristján orti líka um bílstjórana á Stefni, sem  þóttu lítið betri.

Vörubílastöðin Stefnir

stendur Polli hjá.

Ökuþórar illa gefnir,

aka hennni frá

Verkamenn hjá KEA unnu mikið með bílstjórunum; þeir lestuðu gjarnan bílana og losuðu þá aftur, í þá daga var mölinni til dæmis handmokað á bílana. Þessi harðsnúna verkamannasveit var oft nefnd „setuliðið“. Meðal liðsmanna þar var um tíma Kristján skáld frá Djúpalæk. Einhverju sinni var Tommi að keyra möl og Kristján frá Djúpalæk var einn þeirra sem átti að moka á bílinn. Það var mígandi rigning og Tommi var beðinn fyrir þau skilaboð til karlanna, að vegna veðurs mættu þeir eiga frí það sem eftir væri dagsins. Tommi sneri þessu hins vegar við og sagði körlunum, að þeir ættu að hraða verkinu, verkstjóranum þætti þetta ganga heldur seint. Karlarnir tóku þá að djöflast bálreiðir í rigningunni. Þá var Tomma skemmt, en þegar honum þótti nóg komið á bílinn sagði hann sannleikann. Þá kvað Kristján:

Enginn skyldi Tomma trúa,

tötrum klæddur lítilmenni.

Eðlishvöt hans er að ljúga,

ástríðan að þjóna henni.

Þá kom Geiri þar að og Kristján snaraði óðar fram vísu um hann:

Ekki má ég gleyma Geira,

grey skinninu, punktur komma.

Ekki þarf að yrkja meira,

af því hann er bróðir Tomma.

Bifröst var til húsa í skipagötu 18 og þar fyrir framan er myndin af A-44 tekin. Númer bílanna á Bifröst enduðu öll á 4. Þarna sjáum við A 44, númer sem Lenni Helga, sonur Helga á Bifröst, eignaðist síðar. Óskar Pétursson keypti bílinn hans Lenna, gerði hann upp og hann er enn með númerinu A 44 Þarna voru líka númer eins og A 24, A 104, A 304, A 344, A 644, A 524 og svona mætti áfram telja. Upphaflega mun Bifröst einnig hafa verið með A 4, en það númer fékk Jakob Frímannsson, kaupfélagsstjóri. Ingimundur Árnason, fulltrúi hans, fékk A5!!!

Alltaf er að bætast í hóp Tommara. Á sunnudaginn fékk einn sá yngsti þeirra nafn.  Hann er sonur Gunnars Karls Gíslasonar og Freyju Óksarsdóttur. Athöfnin fór fram í Norræna húsinu í Reykjavík, þar sem Gunnar rekur veitingastaðinn Dill við miklar vinsældir. Sr. Pálmi Matthíasson skírði og drengurinn fékk nafnið Indriði Óskar. Endilega látið okkur vita, ef eitthvað er að gerast í ættinni. Sendið okkur línu og myndir. Póstfangið mitt er gisli@nordri.is.

Hann er Tommaralegur strákurinn, sem fékk nafnið Indriði Óskar. Hér er hann í fangi móður sinnar; Freyju Óskarsdóttur

Þá er öðru ættarmóti Tommara lokið. Það tókst í einu orði sagt frábærlega. Veðrið lék við mótsgesti, allir komu með góða skapið, ákveðnir í að skemmta sér – og það tókst. Um það bil 250 manns sóttu mótið, en fjárhagslegu uppgjöri er ekki lokið. Það er þó þegar ljóst, að tekjur duga fyrir útgjöldum.

Berharð Valsson og Elva María Káradóttir sigruðu í jafnri og spennandi hönnunar og tískusýningar keppni á ættarmótinu. Ákveðið hefur verið, að búningur þeirra verði einkennisbúningur ættarinnar á næsta móti! Á myndinni með Elvu eru Guðmundur Karl og Jakobína Elva, sem ásamt öðrum keppendum komu með frábærar hugmyndir að ættarbúningum.

Þeir eru hreint ódrepandi þessir Tommarar. Í gær voru þeir að slá og raka við Hrísa, til að gera mótssvæðið snyrtilegra. Þetta eru svoddans snyrtipinnar.

Þarna er sviðið komið á sinn stað. Allt að verða klárt.

Og það er ekkert gefið eftir, því í kvöld sást til Tommara á ferð fram fjörð á stórum flutningabíl með aftanívagn. Þar var komið stóra hátíðarsviðið frá Akurkeyrarbæ, sem Páll Brynjar fékk lánað á góðum kjörum og ók með það í eftirdragi  eins og herforingi, rétt eins og Páll lang-afi hans forðum. Það er um fátt meira talað í Eyjafirði þessa dagana en fyrirhugað ættarmót Tommara á Hrísum. Gömul kerling í Grundarplássinu heyrðist hafa á orði, að það væri rétt eins og von væri á forsetanum.

Þeir frændur báru sig fagmannlega við losun flutningabílsins á Hrísum í kvöld.

Hún fór ekki fjarri sannleiknanum, því það eru mörg forsetaefni meðal Tommara! Lokafrágangur fyrir ættarmótið verður annað kvöld og þá er von á heilum her tommara frameftir.  Auk sviðsins komu Páll Brynjar og Stefán með mörk, fánastengur og sitthvað fleira að Hrísum í kvöld. Páll Brynjar er mikill „reddari“ og ósérhlífinn og hjá Stebba Valda tóku sig upp gamlir vörubílstjórataktar. Spáin stendur, það er reiknað með 16-20 stiga hita á Hrísum um helgina. Enda bætist stöðugt í hópinn, nú eru skráningar komnar á þriðja hundraðið og daglega bætist við.

Þeir voru kampakátir í verkslok í kvöld; Páll Brynjar Palla Stínu Palla Tomm og Stebbi Valda Tomm. Stebbi hafði meira að segja hækkað um fetið frá því í gær!

Hvaða Tommari verður númer 200.

Skráningin á „Töðugjaöld Tommara“ um aðra helgi gengur jafnt og þétt. Nú erum við rétt við það að ná öðru hundraðinu. Hver verður númer 200? Sá heppni fær vegleg verðlaun. Veðrið er ekkert sérlega skemmtilegt í Eyjafirði í dag, raunar er það bara hundleiðinlegt. En samkvæmt norskri veðurspá, sem var að birtast rétt í þessu, þá er spáð bongó-blíðu í Eyjafirði mótshelgina. 16-20 stiga hita, takk fyrir!

Kallaliðið er búið að skrá sig á "Töðugjöldin", enda veit það fjólk að það verður sólargleði á Hrísum.

Síðasti „opinberi“ skráningardagurinn er fimmtudaginn 21. júlí. Þá verður staðan tekin, þannig að hægt sé að gefa Greifamönnum hugmynd um fjöldann í mat. En þetta þýðir ekki að skráningu sé lokið á þessum tímapunkti. Síður en svo. Helgi Ómar Sísíar Geira Tomm er „handrukkari“ mótsins og hann verður mættur á mótssvæðið klukkan 16:00 á föstudeginum til að taka við skráningum og greiðslum. Það verður hægt að borga með kortum, því hann er með posa strákurinn! Það verða nefnilega örugglegar margir, sem fá „Töðugjalda“ fiðring þegar blíðan brestur á andartaki fyrir mótshelgina!!!

Dagskráin liggur fyrir og verður sett inn á síðnuna um helgina.
Ef einhverjir vilja koma með hugmyndir eða bjóða sig framm í undirspil, söng eða almenn skemmtiatriði, þá skuluð þið ekki hika við að senda  póst á efni@tommarar.com. Sendið okkur líka efni á síðuna.

Fjólum stráð ættarmót

Nú er morgunljóst, að ættarmót Tommara að Hrísum verður fjólum stráð. Fjóla Krístin Helga Fjólu Tomm hefur tekið að sér að gera mótsvæðið fjólum vænt. Hún hefur fengið í lið með sér hörkudulega og smekklega Tommara, sem ætla að strá fjólum um allt mótssvæðið. Þeir sem muna Fjólu Tomm minnast hennar fyrir hlýju og gæsku. Þess vegna er það næsta víst, að viðmótið sem mætir okkur að Hrísum verður hlýtt og notalegt. En nú er hver að verða síðastur að skrá sig. Það er að verða fullbókað!

Fjóla Krístin hefur löngum kunnað að hafa huggulegt í kring um sig og hún mun strá um sig fjólum á Hrísum